記熟九大投資守則

記熟九大投資守則 (2008年10月7日 曹仁超)

內地大學生平均月入2000元人民幣，如非父母幫助點買樓？家吓最便宜嘅房子月供1500元，供完樓後物業管理費、水電煤、生活開支、娛樂及教育費冇着落。以兩口子月入4000元計，供樓已佔總收入嘅37.5％，超過正常水平30％以上。
中國三十七個大城市房價泡沫最大係溫州，其次係上海、杭州、北京、深圳、寧波、廣州、廈門、南京及天津。十大城市供樓支出皆佔大學生（兩人計）總收入30％以上，估計仍有下調幅度。
ERA房地產聯盟公布年度調查報告，十九個歐洲國家中英國、愛爾蘭及西班牙已進入拐點；德國、法國、奧地利、意大利及瑞典進入萎縮；塞浦路斯、保加利亞、羅馬尼亞、捷克及土耳其陷入停滯。
去年歐洲最貴房地產係盧森堡，平均房價46.2萬歐羅，最便宜係安卡拉7.5萬歐羅。
美國7000億美元挽救計劃，改變唔到景氣周期規律，只係將問題向後拖延，大摩亞洲區董事長羅奇更認為，情況可能比日本及香港更差，因美國消費佔GDP 72％；加上美國人低儲蓄率，必須經過一段長期休養生息期先能重返繁榮。
我地出生後開始學習生命嘅守則（The Rules Of Life）；好多時嚟自我地嘅父母（有其子必有其父母），有時亦從其他人身上學習（三人行必有我師），有D係透過嘗試及錯誤先學曉（例如我老曹1974年嘅經驗同教訓）。只要牢牢記住唔再重犯，我地便可生活愉快。
其中三人（股聖、Dennis Gartman及Puggy Pearson）都係投資界泰斗，他們訂下九大守則，投資者只要遵守便「麥克、麥克」。
前三條由股聖所訂。一、唔好輸錢。一旦面對虧損便設法減少損失（我老曹將佢改良為止蝕唔止賺）。
二、股票市場設計係將金錢由經常性買賣者手中轉到有耐性投資者戶口中。平時遠離證券行，唔好經常炒出炒入。
三、投資者需要的是氣質（Temperament）而唔係智慧。例如獨立思考、對自己有信心而唔係過分自信及控制個人情緒（我老曹改為有智慧不如追逐趨勢）。
另外三條由Gartman所訂。一、屋內永遠唔會只有一隻曱甴。正係福無雙至，禍不單行。去年8月次按危機後，至今金融機構接二連三出現問題，證明永遠屋內唔會只有一隻曱甴。
二、喺牛市中可長線持有，熊市中只宜拋空（我老曹改為牛市中不妨做好友，一旦熊市來臨便持盈保泰，因我老曹冇膽拋空）。
三、只有基礎分析與技術分析一致先入市，投資集中優質股，入市時機用技術分析。
最後三條由Puggy Pearson所訂。一、20／80定律。無論喺賭場或期指市場，贏家只佔20％，輸家佔80％。要成為20％少數，必須明白Top Down或Bottom Up策略（何謂Top Down？例如去年10月股市見頂後便保持睇淡，直到出現一浪高於一浪為止；何謂Bottom Up？即股市見底後便保持睇好，直到出現一浪低於一浪為止）。利用Pearson嘅方法，各位唔使經常問我老曹熊市幾時完？喺恒指一再出現新低環境下只宜Top Down。
二、學會管錢。好似賭錢咁，冇理由鋪鋪買，只有形勢最有利時先賭，同時限注（例如熊市中，只動用30％資金，牛市中才動用70％資金）Keep It Simple；唔好賭你輸唔起嘅錢，賭錢時要輕鬆而唔係搏殺；明白風險與回報關係。一如沙蟹，當形勢有利時去盡D，形勢不利時要識投降（唔好忘記止蝕沽盤）。
三、了解自己，嚴守紀律。大部分人賭錢往往輸死而唔會贏死。理由係贏錢時縮，輸錢時賭氣。成功賭徒及成功投資者便相反，就係贏錢時去盡D，一旦輸錢便縮。
上述三位都係當今投資泰斗，值得各位學習。只要善用九大方法，保證你六十歲退休時富有。